Periodic PrEP - لمدة زمنية
قبل ما نغوص بالتفاصيل، مهم نوضح شغلة
قبل ما نبلّش, مهم نوضح إنو بإسرائيل، الطريقة الوحيدة المعتمدة رسميًا اليوم هي أخذ PrEP بشكل يومي.
بس مع هيك، في طرق تانية زي "PrEP حسب الحاجة" (المعروف بـ 2-1-1) أو لِفترات قصيرة – هاي الطرق انعمل عليها أبحاث، ولقوا إنو فعاليتها زي الاستخدام اليومي، بس بشرط تلتزموا بالتعليمات حرفيًا.
بكتير دول حوالين العالم، الطرق هاي معتمدة ومستخدمة بشكل واسع – وهي جزء من سلّة الخيارات المتاحة للوقاية من HIV.
مهم انه تعرف
أخذ PrEP لفترات قصيرة ما بينفع للكل – مثلاً، عند نساء سيس أو رجال ترانس، الطرق هاي مش مضمونة بالحماية من العدوى عن طريق الجنس المهبلي، فبيحتاجوا وقت أطول قبل وبعد العلاقة عشان الحماية تكون فعالة.
نصيحة من القلب؟ احكوا مع طبيب العيلة تبعكم قبل ما تبدأوا بأي نوع من أنواع الـ PrEP – لأن الاستخدام الغلط ممكن يعرّضكم للإصابة بالـ HIV.
ليش أصلاً نحكي عن PrEP لمدة زمنية معينة?
باستطلاع عملناه بشهر يناير 2024، شفنا إنو كتير أشخاص ما بيستعملوا PrEP مش لأنهم ضد، لأنهم ما بيعملوش سكس كتير، أو عندهم فترات معينة فيها نشاط جنسي أكثر – زي سفر، حفلات،أو هيك كل فترة وفترة تيعملوا سكس.
فكل ما كان فيه أكتر خيارات متاحة – أكتر ناس بتختار تحمي حالها.
وطريقة الـ PrEP حسب الحاجة بتعطيك حماي ل 24\7 تعيش وتنبسط وتفرفش, دون الالتزام طويل الأمد.
طيب، كيف بنستعمل PrEP لمدة زمنية معينة؟
هاي الطريقة شغالة بس إذا عملتوا زي ما لازم:
-
اخدوا حبتين (2) PrEP بنفس الوقت، قبل العلاقة الجنسية بـ 2 لـ 24 ساعة.
-
الحماية بتبدأ بعد ساعتين من الجرعة الأولى، وبتضل سارية 24 ساعة – بس لازم تكملوا الجرعات اللي بعدها.
-
بعدها – تاخدوا حبّة وحدة كل 24 ساعة، طول فترة النشاط الجنسي، وتكملوا كمان يومين بعد آخر مرة مارستوا الجنس.
استعمال غلط، أو تاخير، أو نسيان – ممكن يخليكم معرضين للعدوى.
أي نوع من PrEP، سواء يومي أو لفترة معينة – لازم يترافق مع فحوصات ومتابعة طبية كل 3 شهور.
ولا، ما تبدأوش PrEP قبل ما تعملوا فحص HIV وتحصلوا على نتيجة سلبية.
ليش؟ لأنو إذا أخدتوا الدواء وأنتم أصلاً مصابين ومش عارفين – ممكن يصير في مقاومة للعلاج. وهذا عنجد خطر.
هالمعلومات مش بديل عن استشارة طبية!
إذا بتفكر تبدأ PrEP – احكي مع طبيب العيلة تبعك.
الطريقة الوحيدة المصرّح فيها حالياً بإسرائيل هي الاستخدام اليومي المنتظم مع كوندوم ومتابعة طبية.
استخدام الدواء بشكل غير مطابق للتعليمات ممكن يعرّضك للإصابة أو لمقاومة للعلاج.