شكله بسيط وسهل، يمكن حتى بتحسه بديهي, بس الصراحة؟ بلا بتسمع عن كتير مواقف الواقي انمزق فيها – وكان ممكن بسهولة نتفادى هيك إشي لو بس انتبهنا لكم شغلة مهمة (تنويه: في نقطة قبل الأخيرة كثير مهمة ومش الكل بعرفها).

​

فشو لازم ننتبهله؟

​

الشراء

صيدلية أو أي محل موثوق مثل سوپر فارم بيمشي الحال. وإذا مش متوفر، المهم المكان ما يكون مشبوه ويكون بخزن الواقيات بطريقة صح (يعني مش قبال الشمس مثلاً).

​

تاريخ الصلاحية

دايمًا نفحص تاريخ الانتهاء – عشان نتأكد إنو اللاتِكس مش خربان. المفروض تلاقوه على العلبة الخارجية وكمان على كل مغلف لحاله.

​

علامة جودة

في مليان شركات وأنواع، كل حدا في يختار اللي بناسبه، بس مهم تشوفوا إنو الواقي مرق فحص جودة. بدوروا على علامة الجودة الإسرائيلية (داخل مثلث) أو الأوروبية (CE) – وهدول مضمونين. 

 

تخزين

الواقي لازم ينحط بمكان مظلل وجاف. يعني مثلاً درج أو خزانة – أوك. بس بالسيارة؟ جنب الشباك؟ بالچيب أو المحفظة لفترة طويلة؟  أكيد لا. رايحين تسهروا اليوم؟ حطوه بالچيب، بس تاني يوم إذا ما استعملتوه، رجّعوه لمكان مناسب.

 

واقي فوق واقي؟ لأ وبالعكس!

مش بس إنو ما بزيد الحماية، بالعكس – بيزيد فرصة التمزّق عشان في احتكاك بيناتهم.

​

مزلقات؟ أه، بس مش أي مزلق(جيل)

المزلقات ممتازة وبتقلل خطر تمزق الواقي، بس لازم تكون مخصصة للجنس ومكتوب عليها إنها مناسبة مع الواقي – يعني غالبًا على أساس مي أو سيليكون. مزلقات على أساس زيت؟ أو مزلقات مرتجلة؟ ممكن يكونوا لُطَف، بس بيمزقوا الواقي بكل سهولة.

 

فحص الإغلاق

اضغطوا شوي على نص مغلف الواقي – إذا ما طلع هوا، فهو مسكّر منيح. افتحوه من الجنب، مش من النص، عشان ما تخربوه – وطلّعوه بهدوء.

​

طريقة لباسه الصحّ

قبل ما تلبسوه، اضغطوا على الطرف الصغير (اللي بيشبه فُقّاعة) – وبعد ما تنزلوه لتحت لحد كيس الصفن، بس وقتها فكّوا الضغط. هالفُقّاعة الصغيرة لازم تخلّي مجال للمني، بس إذا ضل فيها هوا؟ ممكن تنفجر وقت الإيلاج وتخرّب كل شي.

​

إنزال الواقي بشكل صحيح

خلصت؟ بلا ما تطوّل زيادة، بتطلع لبرا، وبتمسك الكندوم من القاعدة وبتنزّلو، قبل ما يروح الإنتصاب. إذا لأ ممكن يضل جوّا.