من زمان والـ PEP موجود عشان يمنع انتقال الـHIV بعد تعرّض بخطر عالي. PEP هو علاج دوائي (زي الكوكتيل اللي بياخدوه المصابين بـ HIV لكل الحياة), بس لفترة قصيرة – 28 يوم.

PEP

طيب، متى أفكر أطلب PEP؟

إذا صار واحد من هدول:

كنت سلبي وعملت علاقة جنسية بدون واقي ذكري، مع حدا معروف إنه ايجابي ل HIV بس مش معروف شو وضعه .
كنت مع شريك ما بتعرف إذا هو ايجابي للفيروس HIV أو لا، واستعملتوا واقي بس نخزق خلال السكس.
مارست سكس بدون واقي ذكري، مع حدا ما بتعرف إذا هو مريض أو معروف إنه ايجابي بس مش تحت علاج (يعني مش undetectable).

طيب، وين ومتى لازم أروح؟

أسرع ما يمكن – وبحد أقصى 72 ساعة من بعد السكس – تروح عـ قسم الطوارئ بأي مستشفى.
24/7 – كل الأيام، كل الساعات.

بس انتبه: مش كل حدا بيروح بيعطوه PEP. القرار عند الطبيب بالمستشفى، وبعد ما يستشير أخصائي أمراض معدية أو طبيب HIV. الطبيب رح يسألك أسئلة عن السكس الأخير، وعن عاداتك الجنسية – عشان يقرّر إذا في حاجة للعلاج.

المستشفيات اللي فيها مراكز AIDS ممكن تعطيك العلاج أسرع:

سوروكا – بئر السبع
كابلان – رحوفوت
هداسا عين كارم – القدس
شيبا – تل هشومير
إيخيلوف – تل أبيب
مئير – كفار سابا
عيادة هبارسيم-حيفا
رمبام – حيفا
هليل يافي – خضيرة

بحاجة لتحويلة؟

بشكل عام، زيارة الطوارئ بتكلفك 715 شيكل، إلا إذا معك تحويلة من طبيب العيلة أو من الخط الساخن تبع صندوق المرضى (استمارة17). الوقاية من HIV مش بحالات الإعفاء التلقائي – فلازم تهتم تاخد موافقة مسبقة عشان ما تدفع.

شو بيصير بالمستشفى؟

أول شي، بيفحصوا إذا أصلاً عندك HIV أو لأ. كمان، بفحصوا الكبد والكلى. إذا كان السكس فيه إيلاج\عدوى، بيعطوك مضاد حيوي عشان أمراض تانية زي السيلان والكلاميديا.

رح يسألوك أسئلة شخصية: عن الشريك، نوع السكس، متى صار، شو كان دورك (سالب-موجب)، وإذا صار قذف جوا أو برا.
الأسئلة هاي مش للفضول، هي ضرورية لتقييم الوضع. وإذا أنت كنت مرتاح أو مش مرتاح – حاول تتجاوز الإحراج، لأنه الموضوع مهم وممكن يحميك. كل شي بتقوله للطبيب محمي بسرية تامة.

بعدين؟

إذا تقرر إنك تحتاج PEP – بيعطوك علاج ليوم أو يومين وبعدين ووصفة لمدة 25 يوم كله عبعضه فترة 28 يوم التزام بجرعة باليوم، وبطلبوا منك تتواصل مع مركز AIDS لتكمّل العلاج وتعمل فحوصات.
بعد 3 أسابيع من نهاية العلاج، لازم تعمل فحص HIV عشان تتأكد إنك ما انعديت.

طيب، إذا في PEP – ليش أستخدم واقي أصلاً؟

لأن PEP مش وسيلة حماية, وما بيغني عن الواقي.
هو مش حبّة اليوم اللي بعده – هو علاج معقّد، مع أعراض جانبية، وبيعتمد على موافقة طبيب.

كمان شغلات تحطها بالحسبان:
الكوندوم لما يُستخدم صح – بيمنع العدوى بشكل كامل. PEP بس بيقلل الاحتمال.
الكوندوم ما بيسبب أعراض جانبية. PEP؟ آه، وبكثرة.
الكوندوم ببهدلك 10 دقايق. PEP ببهدلك 28 يوم.
الكوندوم بتلاقيه بالسوبر، الكيوسك، البنزين. PEP؟ بس من طوارئ المستشفى وبموافقة طبيب.
الكوندوم بقرارك. PEP؟ بقرار الطبيب – ومش مضمون يوافق.